૮૭ વર્ષીય ગુજરાતી વૃદ્ધ માતાને છેતરી તેમના નામે રહેલા બોરીવલીના ફ્લેટ પર ગિફ્ટ ડીડ તૈયાર કરાવી લેવાના બનાવમાં મુંબઈ સિટી સિવિલ કોર્ટે મહત્વનો ચુકાદો આપ્યો છે. અદાલતે નાના પુત્રના નામે કરાયેલું ગિફ્ટ ડીડ રદ કરીને વૃદ્ધ માતાનો ફ્લેટ પરનો માલિકી હક પુનઃસ્થાપિત કર્યો છે.

કેસમાં ફરીયાદી એક નિવૃત્ત ગુજરાતી શિક્ષિકા છે. તેમના જણાવ્યા અનુસાર, તાજેતરમાં અવસાન પામેલા નાના પુત્રે ઇમારતના પુનર્વિકાસ (રિડેવલપમેન્ટ) માટેના દસ્તાવેજ પર સહી કરવાની હોવાનું કહી તેમને નોંધણી કચેરીએ લઈ ગયો હતો. અંગ્રેજી ભાષાનું પૂરતું જ્ઞાન ન હોવાનો અને પુત્ર પરના વિશ્વાસનો દુરુપયોગ કરીને તેણે માતાના નામે રહેલી મિલકત પોતાના નામે હસ્તાંતરિત કરતું ગિફ્ટ ડીડ તૈયાર કરાવી લીધું હતું.

અદાલતે નોંધ્યું કે સામાન્ય સંજોગોમાં ગિફ્ટ ડીડ રદ કરી શકાય નહીં, પરંતુ જો તે બળજબરી, દબાણ, છેતરપિંડી અથવા દાતાની સ્વૈચ્છિક અને મુક્ત સંમતિ વિના કરવામાં આવ્યું હોય તો એવું હસ્તાંતરણ કાયદેસર ગણાતું નથી અને આવા સંજોગોમાં ગિફ્ટ ડીડ રદ કરી શકાય છે.

કેસની વિગત મુજબ, ગિફ્ટ ડીડ થયા પછી થોડા જ સમયમાં પુત્રે માતા-પિતાને ભાડાના મકાનમાં રહેવા માટે ખસેડી દીધા હતા અને નોંધણીકૃત દસ્તાવેજ આપવાનો પણ ઇનકાર કર્યો હતો. આ ઘટનાથી સમગ્ર છેતરપિંડીનો ખુલાસો થયો હતો.

કોર્ટએ નોંધ્યું કે અંગ્રેજીમાં તૈયાર કરાયેલા દસ્તાવેજનું લખાણ ફરીયાદીને ગુજરાતીમાં સમજાવવામાં આવ્યું હોવાનો કોઈ પુરાવો રજૂ થયો નથી. બચાવ પક્ષે દાવો કર્યો હતો કે માતાએ સ્વેચ્છાએ ગિફ્ટ ડીડ કરી હતી અને મોટો પુત્ર તેમને ભડકાવે છે, પરંતુ અદાલતે આ દલીલો અસંગત અને વિશ્વસનીયતા વિનાની ગણાવી હતી.

આ રીતે, અદાલતે સ્પષ્ટ કર્યું કે દાતાની સ્વૈચ્છિક સંમતિ વિના, બળજબરી કે છેતરપિંડીથી કરાયેલું ગિફ્ટ ડીડ કાયદે ટકાઉ નથી અને તેને રદ કરી શકાય છે.