મકાન તોડી પાડવાથી ભાડુઆતના હક સમાપ્ત થઈ જતા નથીઃ હાઈકોર્ટ

સિવિલ પ્રોસિજર કોડની કલમ 115 હેઠળ અરજી પર સુનાવણી કરાઈ

મુંબઈ હાઈ કોર્ટે મહત્ત્વપૂર્ણ ચુકાદામાં ઠરાવ્યું છે કે, ખાલી કરાવવાના દાવાનો નિકાલ બાકી હોય તે દરમિયાન ભાડે આપેલું મકાન તોડી પાડવામાં આવે તો માત્ર મકાનનો નાશ થવાથી ભાડુઆતના હક્ક સમાપ્ત થતા નથી અને મકાનમાલિકની ખરી જરૂરિયાતનો આધાર પણ આપોઆપ ખતમ થતો નથી. કોર્ટે સ્પષ્ટ કર્યું કે જ્યારે ભાડે આપેલી મિલકત ઈમારત સાથે જમીનનો સમાવેશ કરે છે, ત્યારે ઈમારત તોડી પાડવામાં આવી હોવા છતાં જમીન અસ્તિત્વમાં રહે છે, અને તેથી ભાડુઆતનો કાનૂની હક યથાવત્ રહે છે. આ મામલે

જસ્ટિસ એમ.એમ. સામેએ સિવિલ પ્રોસિજર કોડની કલમ 115 હેઠળ દાખલ થયેલી સિવિલ રિવિઝન અરજીની સુનાવણી કરી હતી. મકાનમાલિકે મહારાષ્ટ્ર ભાડા નિયંત્રણ અધિનિયમ, 1999ની કલમ 16(1)(જી) હેઠળ પોતાની વાસ્તવિક જરૂરિયાત અને કલમ 16(1)(એન) હેઠળ બિન-ઉપયોગના આધારે ભાડુઆતને ખાલી કરાવવા માટે દાવો દાખલ કર્યો હતો. ટ્રાયલ કોર્ટે મકાનમાલિકના પક્ષમાં ચુકાદો આપ્યો હતો. જોકે અપીલ દરમિયાન મ્યુનિસિપલ નોટિસના આધારે ઈમારત જોખમી જાહેર થતાં તોડી પાડવામાં આવી હતી, જેના આધારે અપીલ કોર્ટે ખાલી કરાવવાનો હુકમ રદ કર્યો હતો.

હાઈ કોર્ટે જણાવ્યું કે ખરી જરૂરિયાતનું મૂલ્યાંકન કરવા માટે મહત્ત્વપૂર્ણ તારીખ દાવો દાખલ કરવાની તારીખ હોય છે અને ત્યાર બાદની ઘટનાઓ ફક્ત ત્યારે જ અસરકારક બને છે જ્યારે તે જરૂરિયાતને સંપૂર્ણપણે નકારી કાઢે. કોર્ટે નોંધ્યું કે ઇમારત તોડી પાડવાથી મકાનમાલિકની જરૂરિયાત આપોઆપ નકારી શકાય નહીં. અપીલ કોર્ટે પુરાવાઓનું ખોટું મૂલ્યાંકન કર્યું હોવાનું જણાવી, હાઈ કોર્ટે અપીલ કોર્ટનો 12 સપ્ટેમ્બર, 2024નો ચુકાદો રદ કર્યો અને ટ્રાયલ કોર્ટનો 3 જુલાઈ 2018નો ખાલી કરાવવાનો હુકમ પુનઃસ્થાપિત કર્યો. આ સાથે સિવિલ રિવિઝન અરજીને આંશિક રીતે મંજૂરી આપવામાં આવી.